Яңалыклар

«Идел – йорт» янәдән дусларын җыйды

Быел “Идел – йорт” уналтынчы тапкыр уздырылды. Аның Минзәлә зонасына караган районнардан катнашкан үзешчән театр коллективларының чыгыш ясау дәрәҗәсе дә шактый үсеш кичергәнлеге аермачык күренде. Сарман, Актаныш,Минзәлә һәм Мөслим районнары вәкилләре, гадәттәгечә, сынатмадылар. Фестивальнең жюри рәисе булып озак еллар дәвамында Камил ага Саттаров эшләде. Быел исә аны драматург, танылган режиссер Гафур Каюмов алыштырды.

   Бәйрәмне Сарман районы халык театры Флорид Бүләковның “Сөясеңме, сөямисеңме?” драмасы белән ачып җибәрде. Профессиональ режиссер Нәфисә Исмәгыйлова кулы сарманлыларда ярылып ята – һәр сүз, хәрәкәт, мизансцена төгәл , үзешчән артистлар үз рольләрендә уйныйлар гына түгел, ә яшиләр.Гадәттә, беренче чыгыш ясаган коллективтан калган тәэсирләр икенче, өченче көнгә бераз сүрелә төшә, ә менә Сарман халык театры шәхсән минем үземдә җылы, матур истәлекләр калдырды.

   Үзебезнең Минзәлә районы Тауасты Байлар авылы халык театры Г.Камалның “Бүләк өчен”комедиясен сәхнәләштергән. ТРның атказанган мәдәният хезмәткәре Мөслимә Гайниеваның коллективында шактый тәҗрибә туплаган Фирдәвес Гайфуллин, Ләүсирә Ханова, Гүзәл Шәйхетдиновалар белән беррәттән авыл хуҗалыгы техникумы студенты Фәнил Шәйхетдинов һәм быелгы дебютантка Мәрьям Гимадиевалар катнашты.

    Актаныш районы Киров авылы халык театры тәкъдим иткән Рәлиф Кинҗәбаевның “Туй күлмәгем калдым кочып”драмасы ике яклы фикер калдырды. Беренчедән, искиткеч сценография (сәхнә бизәлеше, декорацияләр) тамашачыда профессиональ театр куйган спектакльне хәтерләтә. Икенчедән, үзешчән артистларның сөйләм манералары, бер үк мизансценалар (ары –бире , еш әйләнеп йөрүләр) шактый ялыктырды. Актанышлылар хуҗалык җитәкчесе И.Ф. Гаяновны продюсерыбыз, диделәр. Барлык материаль ярдәмне күрсәтүче кеше була инде ул. Илфак Фикатович коллектив белән үзе дә бирегә килгән. Мондый фидакарьләр булганда Актаныш районы мәдәнияте һәрчак югарылыкта булачак.

    Мөслим мәдәният йорты халык театры Кәрим Тинчуринның мәңге үлмәс “Сүнгән йолдызлар” музыкаль драмасын күрсәтте.Режиссерлары Зөлфия Фәхретдинова классик әсәрдән куркып тормаган – менә дигән спектакль сәхнәгә куелган. Ә күмәк күренешләр! Афәрин, мөслимлеләр! Искиткеч тәэсирләр калдырдыгыз. Үзешчәннәр Гүзәл Рәхимуллина (Сәрвәр), Илфират Зәйниев (Исмәгыйль), Равил Тимкин (Надир мәхдүм) аерым мактау сүзләренә лаек. Фестивальне югары ноктада тәмамлауда сезнең өлешегез зур, мөслимлеләр!

    “Идел –йорт» фестиваленең жюри әгъзалары ТРның халык артисткасы, Д.Сираҗиев һәм С.Өметбаев исемендәге премияләр лауреаты Р.Муллина, театрның баш режиссеры, Д.Сираҗиев исемендәге премия лауреаты Д.Сәмерханов, ТРның атказанган артисткасы Э.Гәрәева, район мәдәният йорты директоры Э.Хәкимова һәм жюри рәисе Г.Каюмовлар һәр коллективның чыгышына объектив бәя биреп, үз теләкләрен җиткерделәр.

    Гаиләсеннән, төп эшеннән тыш театр сәнгатенә дә вакытын, көчен таба алган һәр үзешчән артист хөрмәткә лаек. Алар елдан –ел остара баралар, тамашачыларның күпләп спектакльләргә йөрүләре шул хакта сөйли. Театр директоры, ТРның атказанган мәдәният хезмәткәре,С.Өметбаев исемендәге премия лауреаты Р.Ш.Шәймәрданов кабат-кабат тамашачыларга да, үзешчән артистларга да рәхмәт сүзләрен әйтте, кайбер яшьләрне алга таба да белем алып үзебезнең театрга эшкә кайтырга чакырды.

Нурсибә Адиева, театрның әдәби бүлеге мөдире | 13.04.2016
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • М.Шамхалов "Кайнана" музыкаль комедия 12+

    Режиссер – Дамир Самерханов,Д.Сираҗиев исемендәге премия лауреаты Рәссам – Ленар Гыйльметдинов, ТРның атказанган сәнгать эшлеклесе Композитор – Азат Хөсәенов, ТРның атказанган сәнгать эшлеклесе Хореограф – Илдус Биктаһиров, ТРның атказанган мәдәният хезмәткәре Җыр сүзләренең авторы – Фәрит Миргалимов Без еш кына гади хакыйкәтьне онытабыз: булганын сакламыйбыз, ә югалткач елыйбыз. Һәрвакыт гаиләләрдә бер-берсенә җайлашулар була, ике хатын-кыз да – әнисе дә, хатыны да бер үк ир-атны ярата. Спектакльдә конфликтның бер ягы - улы Аязга гомер бүләк иткән әнисе, ә икенче ягы - яшь килене Сәгыйдә. Җәннәт беренче көннәрдән үк киленен кабул итми. Шуңа күрә теләсә нинди сәбәп эзләп яшь киленгә бәйләнә. Өметсезләнеп, Сәгыйдә ире өеннән китә. Тик бәхеткә, дуслары, Илдар белән Зарифа хәйлә белән гаиләне коткарып кала. Өйгә, янәдән, татулык, шатлык кайта.

  • М.Карим "Кыз урлау" музыкаль комедия 12+

    Режиссер – Байрас Ибраһимов,ТРның һәм БРның атказанган сәнгать эшлеклесе, Д.Сираҗиев исемендәге премиясе лауреаты Рәссам – Рөстәм Баймөхәммәтов Костюмнар буенча рәссам – Алия Бәйрәмголыва Композитор – Илшат Яхин,БРның атказанган сәнгать эшлеклесе Хореограф – Чулпан Әскәрова, БРның атказанган артисты Эх, яшь чаклар! Нинди гүзәл, рәхәт, гайрәтле вакытлар! Әҗмәгол агай кебек тагын бераз “батырлык”лар өстәп тә сөйләп җибәрсәң, яшь егет- җилкенчәкнең күңеленә “оеткы” салып та куйсаң! Бүген авылда Сабан туе! Әҗмәгол агайның хикәятләре белән канатланган гаярь егет Котлыәхмәт, үзе кебек кыю егетләр белән сөйләшеп авылның беренче чибәрен урлап алып кайтырга ниятли. Тик кәләш диеп урлап алып кайтканы.. юк, мондый борылышны һич көтмәгән иде Котлыәхмәт.

  • Дуслар
  • Сораштыру